HII KWA WAKAZI WA TAIWAN: DOLA MIA KWA KUKAMATA MBU

Wakazi katika mji mmoja nchini Taiwan wameahidiwa zawadi nono kwa kukamata mbu. Shindano hilo lilitangazwa na idara ya afya ya jiji la Kaohsiung, linalenga kupambana na mlipuko wa mbu wanaosababisha homa ya dengue katika eneo hilo.

Wakazi wanatakiwa kukamata mbu wengi iwezekanavyo, wakiwa wazima au hata kama wamekufa, na mtu atakayekamata mbu wengi zaidi atapewa zawadi ya dola 100, imesema idara ya afya. Mshindi wa pili na wa tatu watapewa dawa ya kuzuia mbu na chandarua.

Watu wanatakiwa kuwatega mbu hao, au kuhifadhi 'mizoga' yao, kwa sababu itawasilishwa mbele ya maafisa kwa ajili ya kuhesabiwa.
"Badala ya kuwapiga faini watu wanaoshindwa kuweka mazingira safi, tunadhani mradi huu utasaidia kuhamasisha ushirikiano," amesema Ho Hui-ping, akizungumza na tovuti ya Focus Taiwan.

Zaidi ya maambukizi 7,000 yameripotiwa mjini Kaohsuing, huku wagonjwa wapya mia mbili wakipatikana kila siku, limeripoti gazeti la China Post.