VIBANDA VYA CINEMA VYA HAMASISHA NGONO

WADAU wa mapambano dhidi ya ugonjwa wa ukimwi mkoani Kilimanjaro wameiomba serikali kufungia vibanda vinavyoonyesha picha za ngono kwani vimekuwa kichocheo kwa watoto wenye umri chini ya miaka 18 na kuchangia kasi ya maambukizi ya ugonjwa huo.

Akisoma risala ya wadau hao wakati wa maadhimisho ya Siku ya Ukimwi Duniani, Cardiosa Peter, alisema kuwepo kwa vibanda vya video za kulipia mitaani, pia kwa kiasi kikubwa vinachangia kumomonyoka kwa maadili ya watoto.

“Wapo wazazi wamekuwa na tabia ya kuwaruhusu watoto kwenda kwenye mabanda na wakati mwingine nyumbani kuangalia picha zinazochochea ngono, na hii inachangia watoto kuanza mahusiano ya kimapenzi mapema na kuwa kwenye hatari ya kupata ukimwi,” alisema Cardiosa.

Alisema matumizi hasi ya teknoloji ya mawasiliano ikiwemo kuwepo kwa vibanda hivyo mitaani, ni moja ya changamoto inayokwamisha jitihada za mapambano dhidi ya ukimwi ambazo zimekuwa zikifanywa na mashirika mbalimbali pamoja na serikali.

Cardiosa alisema changamoto nyingine ni jamii kuendelea kufuata mila na desturi ambazo zinachochea maambukizi ya ukimwi pamoja na kuendelea kuwepo kwa hali ya unyanyapaa.



CHANZO: TANZANIA DAIMA